सांजसंध्या-गझल-मी वळूनी हासले, चुकले जरासे

[Atul Kaviraje]

                                        "सांजसंध्या"
                                       -----------

मित्र/मैत्रिणींनो,

     आज वाचूया, श्रीमती संध्या यांच्या "सांजसंध्या" या कविता ब्लॉग मधील एक कविता (गझल). या कवितेचे शीर्षक आहे- "मी वळूनी हासले, चुकले जरासे (गझल)"

                       मी वळूनी हासले, चुकले जरासे (गझल)--
                      ----------------------------------

प्रश्न त्याचे टाळले, चुकले जरासे
उत्तराशी थांबले, चुकले जरासे

शीळ त्याची ओळखीची रानभूली
मी वळूनी हासले , चुकले जरासे

पाळले ना भान तू मज छेडतांना
लाजले मी लाजले, चुकले जरासे

भावनांना बांधले त्या, धुंद राती
आज का सैलावले , चुकले जरासे

बंद होते द्वार माझे तव सुरांना
का कशी नादावले , चुकले जरासे

रोखले मी आसवांच्या आठवांना
शेवटी रागावले , चुकले जरासे

सोडतांना गांव जे मन घट्ट केले
त्या तिथे रेंगाळले , चुकले जरासे

सांजछाया दाटल्या या अंगणाशी
मी पुन्हा भांबावले, चुकले जरासे

--संध्या
(Monday, June 27, 2011)
----------------------------

                   (साभार आणि सौजन्य-सांजसंध्या.ब्लॉगस्पॉट.कॉम)
                                (संदर्भ-मराठी ब्लॉगर्स.नेट)
                  --------------------------------------------
                       
-----संकलन
-----श्री.अतुल एस.परब(अतुल कवीराजे)
-----दिनांक-13.09.2022-मंगळवार.