मला आवडलेल्या चारोळ्या-चारोळी क्रमांक-99

[Atul Kaviraje]

                                 मला आवडलेल्या चारोळ्या
                                    चारोळी क्रमांक-99
                                ------------------------

मित्र/मैत्रिणींनो,

     --चंद्रशेखर  सरांना  या  प्रेम-चारोळीतून  त्या  दोन  प्रेमी  जीवांचे  उत्कट  नाते , अतीव  प्रेम-रज्जू  बंधने  अभिप्रेत  आहेत . त्यांच्या  चारोळीतील  प्रियकरास  आपल्या  प्रेयसीचा  स्पर्श  फारच  भावतो . एकदा  नव्हे,  दोनदा  नव्हे  तर  पुन्हा  पुन्हा  हवाहवासा  वाटतो . तो  तिला  सांगतोय , की  हा  तुझा  स्पर्श  मी  कितीतरी  वर्षे  जपलेला  आहे . त्याचा  भास , आभास  तू  नसतानाही  मला  जाणवत  असतो , आणि  नकळत  तुझी   हुरहूर  लावीत  असतो . हा  जुना  स्पर्श  विसरता-विसरता , अवचित  एके  दिनी  तू  पुन्हा  नव्याने  माझ्यापुढे  अवतीर्ण  होतेस , आणि  मग  तुझा  हा  नवीन  स्पर्श  मला  पुन्हा  नव्याने  हवा-हवासा  वाटू  लागतो . हा  तुझा  नवीन  स्पर्श  इतका  तीव्र  असतो , की  मी  आजवर  जपलेला  तुझा  जुना  स्पर्श , आणि  मी  माझा  राखलेला  संयम , हे  दोन्हीही  मग  मी  विसरू  लागतो. माझा  माझ्यावरचा  संयम  ढळू  लागतो , त्याचा  घट्टपणा  अवचितच  सैल  पडू  लागतो , आणि  पहाता-पहाता  पुन्हा  मी  तुझ्या  या  नव्या  स्पर्शात  गुरफटून  जातो, गुंतून रहातो. 

===============
तुझ्या जपलेल्या स्पर्शावर
पुन्हा तुझे नवे स्पर्श विसावतात
आणि संयमाची घट्ट वीण
ते माझ्या नकळत उसवतात
===============

--चंद्रशेखर गोखले
----------------
--संकलक-पियुष तायडे
---------------------

             (साभार आणि सौजन्य-संदर्भ-माझ्या लेखणीतून.ब्लॉगस्पॉट.कॉम)
             ------------------------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-25.10.2022-मंगळवार.