इतर कविता-(क्रमांक-51)-येरझारा

[Atul Kaviraje]

                                      इतर कविता 
                                     (क्रमांक-51)
                                    -------------

मित्र/मैत्रिणींनो,

     "इतर  कविता"  अंतर्गत  मी  इतर  कवींच्या  कविता  आपणापुढे  सादर  करीत आहे .

                                        येरझारा
                                       --------

माझ्या छोट्याशा पर्णकुटिकेची
दारं लोटून घेऊन
दोन क्षण डोळे मिटून बसते ,
तेव्हा विसरलेलीच असते मी —-
की माझ्या द्वाराला मिळणार्‍या
असंख्य नागमोडी वाटांच्या टोकाला
एकेक सुबक महाल आहे म्हणून !

पण महालांच्या सार्वभौम राण्या
आपापले लवाजमे सांभाळत
साद घालतच रहातात —–
थेट ह्रूदया पर्यन्‍त !

आणि मी खेचली जाते
त्या जादूमयी दुनियेचा
अविभाज्य भाग बनून !

मात्र माझ्या कुटीतलं तुळशीचं रोप
त्याहून आर्त साद घालतं ——-
कमण्डलूभर पाण्यासाठी.

आणि ———–

नागमोडी वाटांवरून माझी ये – जा
संतत चालूच रहाते .............
पाठी , पुढे ....... पाठी , पुढे.

ह्या धावपळीत
ह्रूदयाचं मात्र काही खरं नाही वाटत आता —-
थांबेल कदाचित आज , उद्या.

तोवर मात्र ——-
येरझारा चालूच रहाणार ? ?

--प्रभा
--संकलक-सुजित बालवडकर
--------------------------

                 (साभार आणि सौजन्य-मराठीकविता.वर्डप्रेस.कॉम)
                --------------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-20.11.2022-रविवार.