आईशप्पथ

[डॉ. सतीश अ. कानविंदे]

       आईशप्पथ

आईशप्पथ दिसली मला
आकाशातली म्हातारी
खात होती पुढ्यात घेऊन
कंदी पेढे सातारी

एका हाताने मोठं जातं
फिरवित होती गडागडा
बर्फ घेऊन दळत होती
आवाज करीत कडाकडा

चमकत होती वीज आणि
खाली पडत होत्या गारा
पाऊस सुद्धा आला होता
सोबत घेऊन सुसाट वारा

आकाशातल्या म्हातारीचे
कंदी पेढे संपले खाऊन
जातं थांबलं नी कडाडणारी
वीज बसली कोपऱ्यात जाऊन

शांत झाला सुसाट वारा
कोसळणारा थांबला पाऊस
आई म्हणाली "शाळेत जा रे
आज नको घरी राहूस"

- डाॅ. सतीश अ. कानविंदे