प्रतिबिंब

[mkapale]

जग खरं आहे जितकं ते असू शकते
तसे तर प्रतिबिंब देखील काही क्षण जुने असते
पाणी आत तर कोणी म्हणते बाहेर जातंय
लाट म्हणजे केवळ पाण्याचे हिंदोळे असते

सत्य आणि खरं ह्यात फरक आहे जाणिवेचा
सूर्य ढळला हे खरं पण तो अजूनही आहे हे सत्य
ह्या दोन शब्दांच्या मध्ये आपण ओळखतो इतरांना
चांगलं, वाईट ह्यात भाकीत जास्त , असते कमी तथ्य

रक्ताच्या थारोळ्यात पडलेले जवान दोन्हीकडे
त्यांचे शौर्य सत्य कि त्यांना विभागणारी तटबंदी
माणुसकी टिकवायला त्यांनाच वेगळं..का करतात
भुकेल्या जीवांची संख्या वाढतांना...शस्त्रांची खरेदी

जयघोष करता करता ढकलती भक्त बाजूला
माणसं वाचायची सोडून ग्रंथ पारंगत होणारे
श्रध्दा आणि शस्त्रांच्या बाजारात विकतात रोज
सामान्य माणसांच्या प्रगतीच्या स्वप्नांचे डोलारे

कोणाचे कोणाला कळलेले सत्य कि भास
समाज्याच्या प्रतिबिंबातून दिसलेला चेहेरा
विचार करून पहा व्यक्ती आहे कि त्याची प्रतिमा
खरी ओळख होणे हाच जीवनाचा खेळ आहे गहिरा....