II गुरुपौर्णिमा II-कविता-5

[Atul Kaviraje]

                                    II गुरुपौर्णिमा II
                                   ----------------

मित्र/मैत्रिणींनो,

     आज दिनांक-०३.०७.२०२३-सोमवार आहे. आज "गुरुपौर्णिमा" आहे. वर्षभरात १२ किंवा १३ पौर्णिमा येतात त्यापैंकी आषाढात येणारी पौर्णिमा गुरुंच्या स्मृतीत समर्पित केली जाते याच पौर्णिमेला गुरुपौर्णिमा म्हणतात. गुरुपौर्णिमेला व्यासपौर्णिमा असेही म्हणतात. ज्यांनी महाभारत, पुराणे लिहिली, त्या व्यासमुनींना वंदन करण्याचा, त्यांची पूजा करण्याचा हा मंगलदिन. आषाढ महिन्याच्या पौर्णिमेला गुरु पौर्णिमा म्हणतात. या दिवशी गुरुची पुजा केली जाते. आपल्या जीवनाला नवे, योग्य वळण देणाऱ्या गुरूजनांविषयी कृतज्ञता व्यक्त करण्याचा हा दिवस असतो. जे आपले जीवन अंधारातून प्रकाशाकडे घेऊन जातात त्यांचे पूजन या दिवशी लोक फार श्रद्धने करतात. मराठी कवितेच्या माझ्या सर्व भाऊ-बहीण, कवी-कवयित्रींना गुरु-पौर्णिमेच्या अनेक हार्दिक शुभेच्छा. वाचूया गुरु-पौर्णिमेवर काही कविता.

                                    "गुरुचा महिमा"
                                   ---------------

  ।। गुरु ज्ञानाचा कल्पवृक्ष विद्येचा अथांग सागर ।।

  ।। ज्ञान देणाऱ्या साऱ्या विश्वाचा असे परमेश्वर ।।

  ।। गुरु शिक्षणाचा महामेरु ज्ञानाची ती माऊली ।।

  ।। शिष्याच्या डोक्यावरची मायेची असे सावली।।

  ।। गुरु कृपा आहे तुमची ती आयुष्याची शिदोरी ।।

  ।। आम्ही पाहुनी तुम्हाला त्या देवतांच्या देव्हारी ।।

  ।। सुंदर तुमची ती मधुर गोड वाणी मन गुंग होई ।।

  ।। तुमची अनंत कीर्ती शिष्य साऱ्या विश्वात गाई ।।

  ।। ज्ञानाचे तुम्ही ते ज्ञानामृत असे आम्हा पाजले ।।

  ।। परमेश्वर रुपी या धरतीवरी ब्रम्हा ते अवतरले ।।

  ।। गुरुचा महिमा आहे आभाळाप्रमाणे तो विशाल ।।

  ।। ज्ञानरुपी हाती घेऊन शिक्षणाची तेजोमय मशाल ।।

  ।। गुरुविणा अपुरे आहे शिष्याचे सार्थकी जीवन ।।

  ।। शिष्याला घडवण्याचे गुरु देत असतो ते वचन ।।

  ।। गुरु ज्ञानाचा निर्झर मायेचा सुंदर तो पाझर ।।

  ।। ज्ञानरुपी माऊलीचा साऱ्या विश्वात तो गजर ।।

--स्वप्नीता आंबेरकर
-----------------

                        (साभार आणि सौजन्य-संदर्भ-स्टोरी मिरर.कॉम)
                       -----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-03.07.2023-सोमवार. 
=========================================