सदरा

[mkapale]

जीवनात घातलेले सदरे
वाटचाल दर्शवतात आपली
शाळेतल्या समान सदऱ्याने
सर्व सारखे ही कल्पना मांडली

मोठे होता बदलत्या काळात मात्र
सदर्यांवर शोभेची आवरणे आली
आपण आवरणेच आहोत वाटले कधी
आवरण काढता सदर्यावर नजर पडली

सदरा तोच होता लहानपणीचा साधा
आवरणाने फक्त दिशाभूल घडली
आजूबाजूलाही सदरेच आहेत मग का
त्याच्या साधेपणाची सवय आता सुटली

आवरणे तात्पुरती अन सदरे कायमचे
संस्कार हे शाळा नेहेमी द्यायची
परिक्षेतील गुणांच्या गणितात राहिली
जीवनाच्या धड्यांची उजळणी घ्यायची

आवरणं बदलतील पण सदरा साधाच राहील
हे जपलं तरच माणुसकी ताजी राहील...माणुसकी ताजी राहील..