जादूची संदूक

[mkapale]

जादूची संदूक

अडगळीत कोपऱ्यात एका
सहज सापडली एक संदूक
अवाक झालो गोष्टी पाहून
उशिरा सापडल्याची होती रुख रुख

हळदीच्या दुधाचा ग्लास वाकलेला
आजीच्या चाटणाची छोटीशी पळी
हसरा चेहेरा आला नजरेसमोर
सुरकुतलेल्या गालावरची खळी

सायकलच्या चैन चा एक तुकडा
मांजाचे मळलेले छोटेसे वेटोळे
रोज आईचा ओरडा खाऊनही
बाहेर खेळतांना गणवेश तो मळे

शाळेच्या बिल्ल्यानी पाणावले डोळे
वळून दिसलेले चित्र , इयत्ता दहावीत
शाळेची इमारत,खिडकी अन ते चेहेरे
पाळंमुळं जगण्याची...खोलवर रुतलित

अडगळीतून संदूक आलीये बाहेर
लहानपण पुन्हा जगूया म्हणतोय
जुन्या गोष्टींनी चालवली जादूची छडी
आठवणींचे चलचित्र Binge Watch करतोय