थेंब

[mkapale]

थेंब

काळे ढग आणि विजा घाबरवतात
पहिल्या दशकात थेंब चकित करतात

येतो पाऊस घेऊन प्रणय अन प्रेम
दुसऱ्या दशकात थेंब आग लावतात

शहरवासी त्रस्त तुंबलेल्या पाण्याने होतात
खुश होतो शेतकरी ओढे दुथडी वाहतात
आईला काळजी आजार जेव्हा येतात
तिसऱ्या दशकात थेंब विविधभाव आणतात

मुले येतात उड्या मारून मस्त पावसात
मोठे कांदाभजी चहाची फर्माईश करतात
चाकरमाने दांडी मारून रमीचा डाव मांडतात
चौथ्या पाचव्या दशकात थेंब दृष्टिकोण बदलवतात

नाविन्य जातं , खूप पावसाळे पाहिलेले असतात
काढे पीत, गोळ्या खात घाबरत जगतात
चष्मा, काठी, पिशव्या सोबतीला असतात
साठीनंतर थेंब फक्त ऋतू बनून राहतात

पावसाचं काय करायचं जे ते ठरवतात
वय फक्त संख्या असेल तर थेंब नेहेमीच सुखावतात