भारताचा स्वातंत्र्य दिवस-कविता-12

[Atul Kaviraje]

                               "भारताचा स्वातंत्र्य दिवस"
                              -----------------------

मित्र/मैत्रिणींनो,

     आज दिनांक-१५.०८.२०२३ आहे. आज "भारताचा स्वातंत्र्य दिवस" आहे. पंडित जवाहरलाल नेहरू यांनी दिल्लीतल्या लाल किल्ल्यावरून १५ ऑगस्ट १९४७ ला तिरंगा ध्वज फडकवला. त्यानंतर १५ ऑगस्ट १९४७ या दिवशी भारताचा स्वातंत्र्य दिन साजरा करण्याची प्रथा सुरू झाली. आपल्या देशाला स्वातंत्र्य मिळून आता ७५ वर्षे पूर्ण झाली आहेत. १५ ऑगस्ट १९४७ रोजी भारताला स्वतंत्र राष्ट्र म्हणून मान्यता मिळाली. या मान्यतेसाठी देशाच्या सेनानींनी सर्वस्वाचा त्याग केला आहे. स्वातंत्र्याचा हा उत्सव प्रत्येक घरात आणि प्रत्येक संस्थेत दिसत असला, तरी राष्ट्रीय स्तरावर हा कार्यक्रम दिल्लीच्या लाल किल्ल्यावर आयोजित केला जातो. मराठी कवितेच्या माझ्या सर्व बंधू-भगिनी कवी-कवयित्रींना १५ ऑगस्टच्या अनेक हार्दिक शुभेच्छा. वाचूया काही कविता.

                                   "स्वातंत्र्य दिन..."
                                  ----------------

गगनी फडफडतो हा तिरंगा

ही या देशाची शान हो,

होतो साजरा आनंदाने

हा स्वातंत्र्य दिन हो...



शूरवीरांनी दिले बलिदान

या भारतमातेसाठी,

दिले स्वातंत्र्य मिळवून

किर्ती त्यांची मोठी

त्या वीरांच्या शौर्याचा, आम्हा अभिमान हो...।



प्राणापेक्षा प्रिय असे ही

आम्हा ही भारतमाता,

या मातेच्या चरणी आम्ही

टेकवितो हा माथा

गाऊ महती या देशाची, गाऊ गुणगान हो...।



नांदती सारे इथे सुखाने

सारेच भाऊ भाऊ,

जात पात नि धर्मभेद

सोडून सारेच देऊ

भारतभूमी ही शूरवीरांची ही संतांची खाण हो...।



सीमेवरती लढतो जवान

पर्वा न करता जीवाची,

देऊन बलिदान करतो

रक्षा भारतमातेची

रक्षण करण्या भारतमातेचे देऊ हा प्राण हो...।



या मातेला करून वंदन

शपथ सारेच घेऊ,

रक्षण करण्या भारतभूचे

एकजुटीने सारे राहू

जगू-मरु आम्ही देशासाठी देऊ बलिदान हो...।



वंदन करूया भारतमातेला

तिरंगी या ध्वजाला,

देशासाठी दिले बलिदान

त्या अमर हुतात्म्यांना

देई आम्हा प्रेरणा तो सीमेवरचा जवान हो...।

--रवींद्र गायकवाड
----------------

                       (साभार आणि सौजन्य-संदर्भ-स्टोरीमिरर.कॉम)
                      ----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-15.08.2023-मंगळवार.
=========================================