रक्षाबंधन-कविता-7-रक्षाबंधन-बंध रेशमाचे

[Atul Kaviraje]

                                       "रक्षाबंधन"
                                      -----------

मित्र/मैत्रिणींनो,

     आज दिनांक-३०.०८.२०२३-बुधवार आहे. आज "रक्षाबंधन" आहे. रक्षाबंधन हा सण श्रावण महिन्याच्या शुक्ल पक्षाच्या पौर्णिमेला साजरा केला जातो. बहीण-भावाच्या नात्यातील पावित्र्य जपणाऱ्या या सणाला हिंदू धर्मात विशेष महत्व आहे. यंदा ३० ऑगस्ट रोजी हा सण साजरा केला जाणार आहे. या दिवशी बहिणी आपल्या भावाच्या हातावर राखी बांधून त्याच्या सुरक्षिततेसाठी आणि दीर्घायुष्यासाठी प्रार्थना करते. मराठी कवितेच्या माझ्या सर्व भाऊ-बहीण, कवी-कवियित्रीना रक्षाबंधन सणाच्या अनेक हार्दिक शुभेच्छा. वाचूया, रक्षाबंधन वर कविता.   

                                     "बंध रेशमाचे"
                                    -------------

श्रावणी नारळी पौर्णिमा,

सण हा मोठा उत्सवाचा,

बंधू करी बांधूनी राखी,

वाढवू गोडवा बंधूप्रेमाचा.


भाऊ बहीणीचे अतुट नाते,

माया, ममता अन् प्रेमाचे,

रक्षाबंधनाच्या पवित्र क्षणी,

दृढ होती हे बंध रेशमाचे.


लाविते जीव भ्राता जीवनी,

ताई तर कधी बनून आई,

बहीणीसारखे निरपेक्ष प्रेम,

जगी दुसरे मिळणार नाही.


लाभो भाऊराया दीर्घायुष्य,

बहीणीची असे सदा कामना,

राहो बंधुराज सदैव तत्पर,

आयुष्यभर भगिनीच्या रक्षणा.


'राखी' म्हणजे रक्षण कर,

'बंधन' म्हणजे नात्याची गुंफण,

देऊनी सकला एकच संदेश,

करु साजरे हे 'रक्षाबंधन'.


भाऊ बहीणीचे पवित्र नाते,

स्नेहाचे असो वा रक्ताचे,

टिकवू प्रेम अन् जिव्हाळ्याने,

अमृततुल्य हे बंध रेशमाचे.

--सविता ढाकणे
--------------

                         (साभार आणि सौजन्य-संदर्भ-स्टोरी मिरर.कॉम)
                         ----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-30.08.2023-बुधवार.
=========================================