श्रीकृष्ण जयंती-कविता-9-मीच आहे कृष्ण

[Atul Kaviraje]

                                      "श्रीकृष्ण जयंती"
                                     ---------------

मित्र/मैत्रिणींनो,

     आज दिनांक-०६.०९.२०२३-बुधवार आहे. आज "श्रीकृष्ण जयंती" आहे. शास्त्रानुसार श्रीकृष्ण जन्म रात्री १२ वाजता रोहिणी नक्षत्रामध्ये झाला होता. त्यानुसार गृहस्थ जीवन जगणारे भक्त ६ सप्टेंबर रोजी श्रीकृष्णाची जयंती साजरी करतील. मथुरेतही जन्माष्टमी ६ सप्टेंबरलाच साजरी केली जाणार आहे. या दिवशी रोहिणी नक्षत्राचा संयोगही असतो. हिंदी पंचांगानुसार, भाद्रपद महिन्यातील कृष्ण पक्षातील अष्टमी तिथी 6 सप्टेंबर 2023 रोजी दुपारी 3.37 वाजता सुरू होईल आणि 7 सप्टेंबर 2023 रोजी दुपारी 4.14 वाजता समाप्त होईल. भगवान श्रीकृष्णाचा जन्म मध्यरात्री झाला असल्याने जन्माष्टमी उत्सव रात्री साजरा केला जातो. त्यामुळे जन्माष्टमीची तारीख 7 सप्टेंबर मानली जाईल. मराठी कवितेच्या माझ्या सर्व भाऊ-बहीण, कवी-कवियित्रीना श्रीकृष्ण जयंतीच्या अनेक हार्दिक शुभेच्छा. वाचूया एक कविता.

                                    "मीच आहे कृष्ण"
                                   ----------------

मीच आहे कृष्ण

अन मीच आहे कान्हा

निळ्याशार आभाळा फुटे

माझ्या रंगांचाच पान्हा

मी उधळते रंग

अन मीच वाजविते पावा

सुरांच्या झुल्यावर मग मीच घेई हेलकावा

मीच धारण केले हाती चक्र सुदर्शन

अन,संकट समयी करेन मीच माझे रक्षण

मीच आहे मोरपीस अन मीच स्पर्शाची अनुभूती

मी चालते वाट एकली अन मीच माझा सारथी

मीच माझे मी पण ,अन मीच व्यापते आकाश

गर्द अंधारी रात्रीमागून मीच उगवता प्रकाश

अशी मीच आहे जर माझ्यातच दंग

सांग कृष्णा तू आता कसा लावशील रंग...

सांग कृष्णा तू आता कसा लावशील रंग...

--राजश्री जाधव
--------------

                         (साभार आणि सौजन्य-संदर्भ-स्टोरीमिरर.कॉम)
                        ----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-06.09.2023-बुधवार. 
=========================================