श्रीकृष्ण जयंती-कविता-14-श्रीकृष्ण जन्म-पाळणा

[Atul Kaviraje]

                                     "श्रीकृष्ण जयंती"
                                    ---------------

मित्र/मैत्रिणींनो,

     आज दिनांक-०६.०९.२०२३-बुधवार आहे. आज "श्रीकृष्ण जयंती" आहे. शास्त्रानुसार श्रीकृष्ण जन्म रात्री १२ वाजता रोहिणी नक्षत्रामध्ये झाला होता. त्यानुसार गृहस्थ जीवन जगणारे भक्त ६ सप्टेंबर रोजी श्रीकृष्णाची जयंती साजरी करतील. मथुरेतही जन्माष्टमी ६ सप्टेंबरलाच साजरी केली जाणार आहे. या दिवशी रोहिणी नक्षत्राचा संयोगही असतो. हिंदी पंचांगानुसार, भाद्रपद महिन्यातील कृष्ण पक्षातील अष्टमी तिथी 6 सप्टेंबर 2023 रोजी दुपारी 3.37 वाजता सुरू होईल आणि 7 सप्टेंबर 2023 रोजी दुपारी 4.14 वाजता समाप्त होईल. भगवान श्रीकृष्णाचा जन्म मध्यरात्री झाला असल्याने जन्माष्टमी उत्सव रात्री साजरा केला जातो. त्यामुळे जन्माष्टमीची तारीख 7 सप्टेंबर मानली जाईल. मराठी कवितेच्या माझ्या सर्व भाऊ-बहीण, कवी-कवियित्रीना श्रीकृष्ण जयंतीच्या अनेक हार्दिक शुभेच्छा. वाचूया एक कविता.

                               "श्रीकृष्ण जन्म-पाळणा"
                              ---------------------

गोकुळाष्टमी जन्म तो झाला

बाळ श्रीकृष्ण जन्माला आला

देवकी पुत्र आला वंशाला

वासुदेवाला आनंद झाला जो बाळा जो जो रे जो।।१।।



बाळ श्रीकृष्ण वाढू लागला

पाळणा त्याचा हलू लागला

गोकुळनगरी आनंद झाला

सारे गोपी होऊन गोळा जो बाळा जो जो रे जो।।२।।



कंस मामाला प्रश्न तो पडला

मारण्याची भीती त्याच्या जीवाला

सारासार त्याने विचार केला

जीवे मारू आता बाळाला जो बाळा जो जो रे जो।।३।।



वासुदेवाने विचार केला

बाळ श्रीकृष्ण दिला येशोदेला

बाळाचा प्राण त्यांनी वाचवला

कंसाचा काळ वाढू लागला जो बाळा जो जो रे जो।।४।।



मित्रांबरोबर खेळू लागला

लंगड्या, पेंद्या, सुदामा जोडीला

राखितो गायी यमुने काठाला

असा हा बाळ नटखट झाला जो बाळा जो जो रे जो।।५।।



एक, एक गवळणीची अडवून वाट

जातो हट्टाने त्यांच्या पाठोपाठ

हळूच फोडतो त्यांचा हो माठ

दह्यासाठी धरूनी हट्ट जो बाळा जो जो रे जो ।।६।।



कंस मामाने केला हो छळ

भयभीत झाले अवघे भूमंडळ

तोच बाळ तो ठरला काळ

कंस मामाचा केला संहार ,जो बाळा जो जो रे जो।। ७।।

--संजय रघुनाथ सोनावणे
----------------------

                      (साभार आणि सौजन्य-संदर्भ-स्टोरीमिरर.कॉम)
                     -----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-06.09.2023-बुधवार. 
=========================================