श्रीकृष्ण जयंती-कविता-17-तू कृष्ण सखा होऊन जा..!

[Atul Kaviraje]

                                     "श्रीकृष्ण जयंती"
                                    ---------------

मित्र/मैत्रिणींनो,

     आज दिनांक-०६.०९.२०२३-बुधवार आहे. आज "श्रीकृष्ण जयंती" आहे. शास्त्रानुसार श्रीकृष्ण जन्म रात्री १२ वाजता रोहिणी नक्षत्रामध्ये झाला होता. त्यानुसार गृहस्थ जीवन जगणारे भक्त ६ सप्टेंबर रोजी श्रीकृष्णाची जयंती साजरी करतील. मथुरेतही जन्माष्टमी ६ सप्टेंबरलाच साजरी केली जाणार आहे. या दिवशी रोहिणी नक्षत्राचा संयोगही असतो. हिंदी पंचांगानुसार, भाद्रपद महिन्यातील कृष्ण पक्षातील अष्टमी तिथी 6 सप्टेंबर 2023 रोजी दुपारी 3.37 वाजता सुरू होईल आणि 7 सप्टेंबर 2023 रोजी दुपारी 4.14 वाजता समाप्त होईल. भगवान श्रीकृष्णाचा जन्म मध्यरात्री झाला असल्याने जन्माष्टमी उत्सव रात्री साजरा केला जातो. त्यामुळे जन्माष्टमीची तारीख 7 सप्टेंबर मानली जाईल. मराठी कवितेच्या माझ्या सर्व भाऊ-बहीण, कवी-कवियित्रीना श्रीकृष्ण जयंतीच्या अनेक हार्दिक शुभेच्छा. वाचूया एक कविता.

                               "तू कृष्ण सखा होऊन जा..!"
                              --------------------------

जर असेल सामर्थ्य,

मित्रा तुझ्या अंतकरणात,

तर थोड औदार्य दाखवायला,

काय हरकत आहे..?



सुदामा सारखा एक मित्र,

आत्मसन्मानाने जगेल,

असा कृष्णसखा तूच होण्यास,

काय हरकत आहे..?



अरे मित्रा, गोष्ट आहे ही,

खुप महत्वाची आणि मोठी,

जरा ऐक.. सांगेन मी तुला,

करून ती, सोपी अन् छोटी..!



नको पंचपक्वान्न थाळी त्याला,

नको तूप, पुरणपोळी,

कांदा, चटणी, भाजीभाकरी,

हीच त्याची गोड पोळी..!



नको बायका मुलांना त्याच्या,

भरजरी रेशमी कपडेलत्ते,

हवी त्यांना वस्त्रे साधी सूती,

केवळ अंग झाकण्या पुरते..!



नको उंच माडी रे त्याला,

नको रे महाल सोन्याचा,

साधेसुधे छप्पर चालेल,

जपता येईल संसार सोन्याचा..!



नको नरम गरम गादी त्याला,

नको रे मखमली गालिचा,

धरणी मायची कुस उबदार,

भासे बिछाना भारीचा..!



नको हिरे माणिक मोती त्याला,

नको रे सोन्याचा गाव,

हवाय त्याला केवळ,

त्याच्या शेतात पिकलेल्या सोन्याला भाव..!



आहे तुझ्यात सामर्थ्य मित्रा,

तर तूच कृष्णसखा होऊन जा,

वाट पाहतोय एक सुदामा,

मित्रा तू जरा औदार्य दाखवून जा..!

--गणेश जी. शिवलाड
-------------------

                        (साभार आणि सौजन्य-संदर्भ-स्टोरीमिरर.कॉम)
                       -----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-06.09.2023-बुधवार. 
=========================================