बैलपोळा-कविता-3-बैल पोळा

[Atul Kaviraje]

                                        "बैलपोळा"
                                       -----------

मित्र/मैत्रिणींनो,

     आज दिनांक-१४.०९.२०२३-गुरुवार आहे. आज "बैलपोळा" आहे. पोळा किंवा बैलपोळा हा श्रावण अमावस्या किंवा भाद्रपद अमावास्या या तिथीला प्रदेशानुसार साजरा करण्यात येणारा बैलांचा सण आहे. बैलांप्रती कृतज्ञता व्यक्त करणारा हा एक मराठी सण असून हा विशेषतः विदर्भात भव्य पातळीवर साजरा केला जातो, विदर्भातील सीमेवर असलेल्या मध्य प्रदेश व तेलंगण सीमाभागातसुद्धा हा सण साजरा होतो. मराठी कवितेच्या माझ्या सर्व बंधू-भगिनी, कवी-कवियित्रीना बैलपोळाच्या अनेक हार्दिक शुभेच्छा. वाचूया, या सणIवर कविता.

                                       "बैल पोळा"
                                      ------------

अमावस्या श्रावणाची

आली घेऊन सणाला

कृषीवल आनंदाने

सजवितो हो बैलाला..१


बैल धुवून प्रेमाने

खांदा मळणी तेलाने

मनोमन आठवतो

काम केलेले बैलाने..२


शिंगे रंगवतो धनी

गोंडे झुंबर शिंगाला

बांधे बाशिंग सुंदर

गळा घुंगराच्या माला..३


अंगावर पांघरतो

झूल सुंदर नक्षीची

तिला आरसे कवड्या

शोभा वाढविते तिची..४


बैल सजला धजला

देवा पुढं उभा केला

त्याला वाजत गाजत

घरी मिरवत नेला..५


घरा मधली गृहिणी

पूजा बैलाची करते

भाव भरल्या हृदयी

पंचारती ओवाळते..६


पान विडा कृषिवला

टिळा कपाळी लावते

घास पुरण पोळीचा

बैलामुखी भरविते..७


देवा नाही मजा येत

बैला शिवाय शेतीला

नाही मिळत सुगंध

कष्टा शिवाय मातीला..८

--पंडित वराडे   
-------------

                        (साभार आणि सौजन्य-संदर्भ-स्टोरीमिरर.कॉम)
                       -----------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-14.09.2023-गुरुवार.
=========================================