धूळ पाटी

[विक्रांत]

धूळ पाटी
*******
प्रश्न हे तुझेच जीवना
अन उत्तरेही तूच दिलेली
धूळपाटी हे जगणे माझे
ठाऊक नच  कधी पुसली ॥

परि कणां ही असे स्मृती
इवली इवली विखुरलेली
त्या कणांचे क्षण कवडसे
खोलवर मज दिसती दबली ॥

त्या क्षणांना भानही नसते
स्वप्न उमटली तुटली फुटली
कधी कुणाची दिठी बावरी
कधी कुणाची स्पर्श सावली ॥

कधी सोनेरी चुकली संधी 
कधी बक्षिसे पदरी पडली
मित्र सुटली पाश तुटली
अन आठवण खोल रुतली ॥

जरी पाटीवर नसती अक्षर
स्तब्ध सपाट दिसते वरवर
तुझे हात जरी लिहणारे
तुला न कळते त्याचे अंतर

🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com 
☘☘☘☘ 🕉�