असणे- दत्त गाणे

[विक्रांत]

असणे
*****
माझ्या असण्याचे गाणे
जेव्हा होईल नसणे
तेव्हा घडेल गवसणे
दत्तात्रेया  तुझे  ॥

जैसे सदा सर्वकाळ
व्यापुनिया आभाळ
राहते ते सलील
दिसल्याविना  ॥

सदा असून नसणे
सदा नसून असणे
अगा असे हे खेळणे
तुझे कौतुकाचे ॥

हा असा नाहीपणा
'नाही  उर्मीच्या विना
माझ्या उरावा अंगणा
जाणीवेच्या   ॥

गूढ जरी मी जाणतो
तव  वर्म समजतो
सारे तुच रे करतो
सर्वातीता ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com 
☘☘☘☘ 🕉� -