एक झिम्मड पाउस

[कुसुमांजली]

एक झिम्मड पाउस घनघोर बरसणारा
धरित्रीच्या शेल्यावर  मारवा पाचु उधळणारा   || १ ||

एक झिम्मड पाउस रानात गुंजणारा
मोराच्या पायात ताल होऊन थिरकणारा || २ ||

एक झिम्मड पाउस कड्यावर कोसळणारा
सागराच्या ओढीने दुथडी भरून वाहणारा || ३ ||

एक झिम्मड पाउस  झाड-झुडूपांचा आसरा घेणारा   
हळव्या क्षणांचा सोबती अळवावर ठरू पाहणारा || ४ ||

एक झिम्मड पाउस समुद्रात मिसळणारा
डोळ्यातले खारे पाणी जणु गोड करु धडपडणारा || ५ ||

एक झिम्मड पाउस शिंपल्यात सामावणारा
मोतियाच्या रूपाने पुनर्जन्म घेऊन राहणारा  || ६ ||

एक झिम्मड पाउस वाळवंटात भरकटणारा
वाळुच्या कणाकणात स्वतःचे अस्तित्व विसरणारा || ७ ||

असाच एक झिम्मड पाउस मनात माझ्या डोकावणारा
अन त्याला भिजवण्याच्या नादात मीच काय तो कोरडा उरणारा || ८ ||

[केदार मेहेंदळे]

sundar kavita...

[कुसुमांजली]

धन्यवाद केदार.

[विक्रांत]

आवडली !